PINAKAMAGALING NA MAGING MABUTI

“Minsan sa kagustuhan nating maging magaling nakakalimutan nating maging mabuti.”  Ito ang linyang tumimo sa aking kaisipan buhat sa pelikulang aking napanuod.

Ang mga tao ngayon ay nagkukumahog, nagmamadali kung paano  sila magiging pinaka magaling sa kung anong larangan man ang kanilang pinasok, gagawin ang lahat matamo lamang ang ganitong estado. Kesehodang mawalan sila ng oras sa kanilang mga mahal sa buhay na nagiging dahilan kung minsan kung bakit napapabayaan ng mga magulang ang kanilang mga anak; at isa sa posibleng epekto nito ay ang pagkalihis ng landas ng mga anak. Nandiyan na hindi maipasa-pasa ng mga anak ang kanilang mga grado sa kanilang eskwelahan o kaya naman ay nalululong na pala ito sa masamang bisyo hindi pa nila napapansin sapagkat abala sila kung paano ang maging magaling sa ibang bagay.

Minsan sa pagnanais na maging PINAKAMAGALING, nakapokus lang tayo sa ating sarili, lagi nating iniintindi kung paano natin mapapalago ang ating mga kakayahan at dahil dito nakakalimutan na natin kung paano ang makibagay sa ating mga katrabaho, nakakaligtaan natin ang salitang  pakikisama at ang masama pa nito sa pag-aakalang ikaw ang pinakamagaling, gusto mo laging ikaw ang masusunod, ikaw lagi ang bida, ikaw lagi ang tama!

Pero ito nga ba ang dapat?...Hindi ba mas akma na bilang tao  bago natin asamin ang na maging pinakamagaling hangarin muna natin kung paano maging MABUTI.

Maging mabuting magulang, para kung may manghihikayat man sa mga anak na lumihis ng landas, maiisip muna nila na napakabuti ng kanilang mga magulang kaya mahihiya na silang gumawa ng hindi tama.

Maging mabuting katrabaho, kahit na kung minsan nangangahulugan ito ng paghingi ng paumanhin sa mga taong nasaktan natin, kung ito naman ang magiging daan upang magkaayos kayo…bakit hindi?

Maging mabuting guro upang mas maengganyo ang mga mag-aaral na pumasok, papasok sila hindi dahil magaling si Titser na magturo, sa halip papasok sila dahil ramdam nila na mayroon silang pangalawang ina na madaratnan sa paaralan. Ina na handang umaruga, makinig at umintindi sa kanilang mga pagkukulang.

Maging mabuti sa paghahanap ng solusyon sa mga problema dahil hindi mahalaga kung naging pinakamagaling ka sa paglalapat ng solusyon sa mga karanasang ito bagkus ang tanong ay naging mabuti ka ba habang pinagdadaanan mo ang mga dilemang ito? Wala ka bang naapakan habang pinipilit mong kumawala sa kinasasadlakan mo? Dahil kung mayroon ka rin lang nasaktan o naagrabyado habang nilalabanan ang problema hindi mo pwedeng sabihin na nalampasan mo ang bagyo ng buong husay.

Dahil sa huli, ang pagiging mabuti ang isa sa mga maipagmamalaki mo  bilang tao at maaaring maging  marka o maiiwang legasi pagsapit ng takdang panahon.

Kung kaya anuman ang gawin sayo ng iyong kapwa maging mabuti sa lahat ng oras at sa lahat ng pagkakataon,sapagkat kapag ikaw ay mabuti, nagiging mabuti rin ang lahat sayo!